Мемлекеттік кеңесші Ерлан Қарин Конституциялық реформаның нәтижесінде билік тармақтары арасында оңтайлы баланс қалыптасқанын айтты. Бұл туралы ол өзінің Телеграм арнасында жазды, деп хабарлайды Egemen.kz.
«Бүгін бүкіл еліміз Конституция күнін атап өтіп жатыр. Бір жыл бұрын мемлекет пен қоғамның сындарлы диалогының арқасында Ата заңға өте маңызды өзгерістер енгізілді. Енді біздің Конституциямызды әділет идеясын басшылыққа алған жаңа қоғамдық келісімнің құқықтық құжаты деуге толық негіз бар. Қасым-Жомарт Тоқаев Президент қызметіне кіріскен алғашқы күннен бастап әділетті қоғам мен тиімді мемлекет құруды басты бағдар етіп ұстады. Жаңарған Конституция аталған саясаттың жүзеге асып жатқанының айқын белгісі», деді Ерлан Қарин.
Оның айтуынша, былтырғы Конституциялық реформаның нәтижесінде билік тармақтары арасында оңтайлы баланс қалыптасты. Халықтың елді басқару ісіне араласу мүмкіндігі артты. Азаматтардың құқығын қорғау тетіктері күшейтілді. Солайша, билік пен қоғам жаңа реформалардың авторларына айналды.